لاہور(جنرل رپورٹر) لاہور میں کھیلے گئے ٹرائی سیریز کے فائنل میں پاکستان نے شاندار بیٹنگ کا مظاہرہ کرتے ہوئے سری لنکا کو 3 وکٹوں سے شکست دے دی۔ گرین شرٹس نے 326 رنز کا ہدف 49ویں اوور میں 7 وکٹوں کے نقصان پر حاصل کرکے ٹرافی جیت لی۔

 پاکستان کی کامیابی میں فخر زمان نے مرکزی کردار ادا کیا۔
انہوں نے صرف 99 گیندوں پر 127 رنز کی دھواں دار اننگز کھیلی، جس میں 11 چوکے اور 6 چھکے شامل تھے۔ یہ ان کے ون ڈے کیریئر کی 12ویں سنچری تھی۔


وکٹ کیپر بیٹر سعد بیگ نے بھی عمدہ کھیل پیش کرتے ہوئے 74 رنز بنائے۔ فخر زمان اور سعد بیگ نے تیسری وکٹ کے لیے 149 رنز کی اہم شراکت قائم کرکے ٹیم کی پوزیشن مستحکم کی۔

دوسری جانب بابر اعظم اپنا کھاتہ کھولے بغیر پویلین لوٹ گئے۔

ہدف کے تعاقب میں عرفات منہاس نے بھی جارحانہ بیٹنگ کی اور محض 31 گیندوں پر 61 رنز اسکور کرکے فتح کی راہ ہموار کی، جبکہ حسن نواز نے 37 رنز کی اننگز کھیلی۔
سری لنکا کی جانب سے مدھوشنکا نے 3 وکٹیں حاصل کیں، فرنینڈو 2 کھلاڑیوں کو آؤٹ کرنے میں کامیاب رہے، جبکہ تھکشانا اور ویلالگے نے ایک، ایک وکٹ حاصل کی۔


اس سے قبل سری لنکا نے پہلے بیٹنگ کرتے ہوئے مقررہ 50 اوورز میں 8 وکٹوں کے نقصان پر 325 رنز بنائے تھے۔
کمندو مینڈس نے شاندار بیٹنگ کرتے ہوئے 131 رنز کی اننگز کھیلی، جبکہ پون رتنائکے نے 77 رنز بنا کر ٹیم کے مجموعے کو قابلِ ذکر بنایا۔


پاکستان کی جانب سے حارث رؤف، سلمان آغا، نسیم شاہ اور شاہین شاہ آفریدی نے دو، دو وکٹیں حاصل کیں۔ اس طرح پاکستان نے بہترین ہدف کا تعاقب کرتے ہوئے فائنل اپنے نام کیا اور ٹرائی سیریز کی چیمپئن بن گئی۔